O alcalde de Vigo, Abel Caballero, reclamou á Consellería de Sanidade a habilitación de “máis espazos de vacinación” contra a covid-19 na área sanitaria ante as “inmensas colas” rexistradas para acceder ao Ifevi.
O alcalde criticou que outras áreas sanitarias galegas conten con tres ou dous puntos de vacinación, mentres na de Vigo só está dispoñible o recinto feiral, polo que se preguntou “por que Sanidade está a facer estes malos tratos”.
Neste sentido, volveu denunciar as “inmensas colas” de vehículos e persoas rexistradas “á choiva” durante “estes días” na contorna do Ifevi, ante o que ofreceu polideportivos como o das Travesas, “onde se poden facer vacinacións masivas sen estas esperas”.
Así as cousas, o rexedor remarcou que a cidade “non necesita unha cola de seis quilómetros”, senón “unha boa programación” do proceso, cuxa loxística cuestionou.
Ademais, reprobou que a habilitación do sistema de autocita para a administración de doses a alumnos que realizarán estancias Erasmus durante o próximo curso, “anunciada aos catro ventos pola Xunta”, resultase ser “unha proba”. “Onte fíxoos ir (aos puntos de vacinación) e non os vacinou”, censurou.
Por outra banda, Abel Caballero avanzou que o Concello de Vigo repartirá 20.000 máscaras nos mercados de Cabral, Teis, Calvario, As Travesas, Progreso, Berbés e Bouzas ás 10,30 horas deste sábado. En total, desde o inicio da pandemia entregáronse máis de 400.000, todas elas enviadas polo Goberno central.
