A Policía Local de Vigo detivo a un condutor de 56 anos de idade tras agredir a un axente que evitou que se fuxise dun control no que triplicara a taxa de alcoholemia máxima permitida.

Segundo relatou a Policía Local, sobre as 5,00 horas do pasado 3 de xullo unha patrulla que se atopaba na rúa Canido en labores de vixilancia e control do ámbito da seguridade viaria en tránsito por esa vía cruzouse cun turismo que “circulaba invadindo o sentido contrario”, polo que os axentes tiveron que desprazarse á dereita “para evitar a colisión”, engade.

Tras iso, os axentes iniciaron a persecución e interceptaron o vehículo na Avenida Samil, nas inmediacións da ponte sobre o Río Lagares, concretan as mesmas fontes policiais.

Os policías procederon á identificación do condutor, D.R.G., de 56 anos e veciño de Vigo, quen presentaba “claros síntomas” de estar baixo os efectos do consumo de bebidas alcohólicas, puntualiza a Policía Local.

Por iso, procederon a realizarlle o test, no que obtivo positivo de 0,97 mg/l, o que implica triplicar a taxa máxima permitida de alcoholemia. O condutor negouse a realizar a proba de contraste e foi advertido no acto de que iso constitúe unha desobediencia grave, o que leva denuncia xudicial e instrución de dilixencias.

Ante esa información, destaca a Policía Local, tratou de iniciar a marcha do vehículo coa intención de darse á fuga, pero un dos axentes introduciuse pola porta do condutor e retirou as chaves do contacto, ao que recibiu como resposta unha puñada na cara do condutor que logrou bloquear co antebrazo.

Por estes feitos este home foi detido por un delito de desobediencia grave e atentado.