Galicia inicia o verán con 1.250 casos activos de Covid-19 –tras catro días en descenso continuo–, 59 pacientes hospitalizados por este coronavirus –un menos que a xornada anterior– e 56 novos contaxios –case unha vintena menos–.

Segundo os datos publicados na mañá deste luns pola Consellería de Sanidade con rexistros ata as 18,00 horas deste domingo, por áreas sanitarias, a presión hospitalaria aumentou na de Vigo, onde continúan dúas persoas ingresadas pola Covid en UCI e ascenden a nove os pacientes doutras unidades –un máis–.

CASOS ACTIVOS EN DESCENSO

Pola súa banda, os casos activos de Covid-19 continúan coa tendencia descendente por cuarta xornada consecutiva e arrincan este verán con 1.250, que supoñen 20 menos que a xornada anterior, ao haber máis altas (75) que contaxios (56), ao que se engade un falecemento. Por áreas sanitarias, as infeccións activas descenden nas de Vigo (-14) que ten 197 casos activos.

MENOS CONTAXIOS

En canto aos novos contaxios de Covid detectados con calquera tipo de proba arrincan esta semana con 56 en Galicia, que supoñen 19 menos que a xornada anterior, na que houbo 75. Tan só se detectaron dous novos casos na área de Vigo.