O alcalde de Vigo, Abel Caballero, anunciou este venres unha exención do cento por cento no recibo do lixo de 2021 para 2.000 locais de hostalaría da cidade, que supoñen un 12 por cento do total de establecementos, como medida de apoio pola crise provocada pola pandemia de Covid.

O rexedor explicou que esta rebaixa custará ás arcas municipais case un millón de euros, e beneficiará a toda a hostalaría, singularmente locais de lecer nocturno: 9 discotecas, 120 pubs, 1.281 cafetarías e 270 restaurantes de diferentes categorías.

O sector turístico, que tivo limitacións pero non peche total durante a pandemia, conta cunha redución do 75 por cento nesta taxa para outros 90 negocios, entre hoteis, hostais e axencias de viaxes.

A rebaixa tamén se aplicará a establecementos de hostalaría situados en clubs ou asociacións, polo que se suman 130 actividades máis, así como 62 ximnasios e 6 cinemas.

Abel Caballero enmarcou esta medida nas actuacións de apoio ao sector, entre as que tamén están as bonificacións fiscais aplicadas durante o tempo de peche por decreto autonómico (auga, lixo e vao comercial), ou a chamada ‘taxa cero’ a terrazas.

Segundo recalcou, o apoio total do Concello ao sector ascende a 5 millóns de euros, “sen ter competencia e sen recibir fondos nin do Goberno de España nin da Xunta de Galicia”.