As asociacións de veciños de Teis e Chapela anunciaron a convocatoria de novas mobilizacións ante o atraso na supresión da peaxe de Redondela, na AP-9, e en protesta polas “escusas” dos diferentes gobernos do Estado á hora de executar os compromisos de bonificación e melloras relativas a ese viario, que xestiona a concesionaria Audasa.
“Xa basta de enganos e escusas”, proclamaron os representantes veciñais, que lembraron que levan “anos padecendo as mentiras e falta de vontade política dos gobernos do Estado”. “Agora a escusa é a negativa da concesionaria Audasa (a aceptar o plan de bonificacións e supresión da peaxe de Redondela), antes foi a falta de orzamentos ou un estudo de tráfico; levamos así anos”, criticaron.
Por outra banda, volveron expresar a súa decepción porque non se aplicaron aínda as rebaixas e a supresión da peaxe de Redondela, a pesar de que a medida conta con partida nos Orzamentos Xerais. “Non entendemos que haxa que esperar ata xullo, reivindicamos que se suprima de forma inmediata”, reclamaron.
Así mesmo, engadiron que as súas reclamacións pasan tamén pola adopción doutras medidas, pendentes desde hai tempo, como a conversión en tramo urbano da AP-9 ao seu paso por Teis, a instalación de pantallas contra os ruídos, a mellora dos pasos elevados ou as obras de reposición de servizos e ‘humanización’ na parroquia de Chapela.
