Dúas persoas tiveron que ser trasladadas ao presentar síntomas de inhalación de gas, debido a un posible escape no seu domicilio en Tirán, no concello de Moaña. O 112 Galicia foi coñecedor dos feitos pouco despois das 7,00 horas, mediante unha chamada dos servizos sanitarios.

Na comunicación, os profesionais sanitarios afirmaban estar a facer o traslado dun pai e unha filla ao presentar, ambos, síntomas de inhalación de gas. Ademais, engadían que outros membros da familia estaban xa ventilando a vivenda e que se atopaban ben.

Con esta información, os operadores do Centro Integrado de Atención ás Emerxencias de Galicia deron aviso aos Bombeiros do Morrazo, aos axentes da Garda Civil e da Policía Local, e á empresa subministradora do gas.

Xa desde o lugar dos feitos, os bombeiros confirmáronlle ao 112 que, tras facer as comprobacións necesarias na vivenda, a situación quedaba segura.