A substitución dunha xunta de dilatación na ponte de Rande, na autoestrada AP-9, afectará o tráfico nesa vía en sentido Vigo o próximo fin de semana, segundo confirmou o Ministerio de Transportes, Mobilidade e Axenda Urbana (Mitma).

Así, os traballos realizaranse á altura da pila sur da ponte e consistirán na substitución dunha xunta de dilatación do taboleiro central da ponte. Segundo informou o Mitma, a actuación comezará ás 9,00 horas do sábado e está previsto que finalice sobre as 17,00 horas do domingo.

Durante ese período de tempo será necesario realizar un corte de circulación do carril dereito do taboleiro central, en toda a lonxitude da ponte, de maneira que os vehículos procedentes de Pontevedra circularán polo carril esquerdo mentres que aqueles que proveñan do Morrazo terán que facelo a través do taboleiro lateral ampliado (en ambos os casos, en sentido Vigo).

O tráfico en dirección a Pontevedra non se verá afectado e a incidencia e indicacións de circulación estarán debidamente sinalizadas na autoestrada e a través dos paneis de información.