A Fiscalía pide penas que suman 9 anos de cárcere para un home acusado de agredir e ameazar ao seu veciño e á filla deste en Vigo, e que será xulgado o xoves na sala do Penal número 3 da cidade olívica.
Segundo o escrito de acusación pública, o procesado (que ten antecedentes xudiciais por malos tratos no ámbito familiar e por ameazas) tivo un altercado o 16 de novembro de 2019 cun veciño do seu mesmo edificio. No transcurso da rifa, o acusado golpeou cunha barra de ferro ao seu veciño na cabeza, causándolle unha ferida nunha cella.
Dous días despois, tras reprochar o xenro da vítima a súa conduta, o acusado foi a casa do seu veciño cun pau nunha man e un obxecto cortante na outra. Mentres batía na porta e causaba danos, comezou a gritar: “Vouche a apuñalar, vouche a matar”.
Ao pouco tempo, o acusado acudiu de novo á porta do seu veciño acompañado por un mozo menor de idade, e volveu proferir berros e ameazas, con ánimo de seguir aterrorizando á vítima. O veciño chamou á Policía, que acudiu ao lugar e obrigou ao acusado a marchar, á vez que detivo ao menor que o acompañaba (por outros feitos que non teñen que ver con esta causa).
Outro dos días, o acusado, ao darse conta de que a filla do seu veciño estaba no descanso da escaleira en compañía doutra persoa, saíu do seu domicilio e dirixiuse cara a eles armado cun anaco de cristal e un punzón: “Andádevos con ollo que vos vou acoitelar, pola vosa culpa levaron ao meu amigo”.
DELITOS E PENAS
Por todo iso, a Fiscalía acúsao dun delito de lesións con instrumento perigoso, dun delito continuado de ameazas e de dous delitos de ameazas (nas persoas da filla do veciño e o seu acompañante), todo iso coa circunstancia agravante de reincidencia.
Así, pide que sexa condenado a penas que suman 9 anos de prisión e reclama que se lle prohiba achegarse ao seu veciño durante 6 anos, e á filla deste e o seu acompañante durante 3 anos.
En canto á responsabilidade civil, o ministerio público reclama que indemnice ao seu veciño en case 600 euros polas lesións e polos danos causados na porta da súa vivenda.
