A Agrupación Europea de Cooperación Territorial do Río Miño (AECT Río Miño) reclamou que o fin do estado de emerxencia de Portugal, previsto para este sábado, “leve a apertura das fronteiras” con España “de maneira inmediata”.
O vicedirector da Agrupación, Uxío Benítez, remarcou que “non tería ningún sentido que se anuncie a non renovación do estado de emerxencia e non leve parella a apertura”, posto que o peche de fronteiras “vai cumprir tres meses nos próximos días”.
O presidente luso, Marcelo Rebelo de Sousa, anunciou o martes que non se renovará o máximo nivel de alerta contemplado na lexislación de Portugal, de tal forma que expirará o sábado, 1 de maio, a medianoite.
Neste contexto, Benítez tamén comunicou que, con intención de “chamar a atención de todas as institucións”, a AECT instalou “unha gran pancarta reivindicativa en Ponte da Amizade, que une Tomiño con Vila Nova de Cerveira (Portugal).
Este cartel leva impreso a mensaxe ‘EU Help. Open the border’, e busca reforzar a petición da agrupación de que se destinen fondos europeos a reactivar a economía da zona, a cal sufriu “unha grave deterioración tanto pola pandemia en si como polo feito de estar nunha localización transfronteiriza”.
