Efectivos de Bombeiros de Vigo apagaron un incendio declarado nun vehículo que supostamente fora roubado e que, como consecuencia das chamas, resultou totalmente calcinado.
Segundo informou a Policía Local de Vigo, os feitos ocorreron pouco antes das 6,50 horas deste xoves, cando unha persoa informou á Sala de Comunicacións do 092 e aos Bombeiros de Vigo de que en Camiño de Fritan había un vehículo ardendo.
Ata o lugar desprazáronse unha unidade policial e efectivos de Bombeiros de Teis, que iniciaron os labores de extinción das chamas, aínda que o vehículo resultou totalmente calcinado. Tras unha primeira inspección ocular, os actuantes apuntaron que o incendio se orixinou na parte traseira do turismo.
Pese ao estado do vehículo, os axentes puideron ler a placa de matrícula dianteira, que figuraba a nome dun veciño de Fornelo de Montes. Este home, no entanto, manifestou que o automóbil non era da súa propiedade e que nunca tivera un coche desa marca.
Ao comprobar os datos do seguro obrigatorio, pescudouse que a póliza fora contratada por outro home, veciño de Vigo de 72 anos, que manifestou que deixara o vehículo estacionado nunha praza de garaxe que ten alugada.
Así, manifestou descoñecer a subtracción do coche, polo que se lle informou de como proceder a denunciar os feitos. A continuación, o vehículo foi retirado polo guindastre do seguro e foi depositado nas cocheiras dunha empresa do Polígono do Rebullón.
