O alcalde de Vigo, Abel Caballero, constatou este martes que os datos de tráfico aéreo do mes de marzo reflicten que, sen a “distorsión” das axudas da Xunta, Peinador é o “principal aeroporto de Galicia”. Así o expresou nunha rolda de prensa, na que lembrou que, segundo AENA, o aeródromo vigués foi o primeiro de Galicia en número de pasaxeiros durante o mes de marzo, con algo máis de 24.000 viaxeiros, e por diante das terminais de Santiago e A Coruña.
O rexedor olívico sinalou que, se as compañías non reciben axudas, como ocorreu no mes de marzo, ponse de manifesto onde funcionan os voos coa demanda do mercado. “Cando se funciona así, Vigo é o principal aeroporto de Galicia. O que distorsiona son as inxentes axudas da Xunta ao aeroporto de Santiago. E iso págase con impostos de Vigo (…), isto é a Xunta atacando a Vigo”, denunciou.
