O proxecto do Porto de Vigo e do Centro de Investigación Mariña (CIM) da Universidade de Vigo (UVigo) ‘Puertalmar’, que se centra na conservación de ecosistemas mariños, ofrecerá este mes varias xornadas formativas e de sensibilización con escolares, un taller de expertos e dúas visitas ao porto vigués.
Segundo informaron os promotores do proxecto, co obxectivo de “incrementar a concienciación sobre a necesidade de atopar solucións innovadoras e verdes que permitan un equilibro entre o bo funcionamento dos ecosistemas e as actividades económicas”, este mes celebraranse diversas iniciativas.
En concreto, os días 14, 15 e 16 de abril organizaranse tres xornadas formativas e de sensibilización virtuais con escolares de educación secundaria e bacharelato de colexios de Vigo e Melilla. Posteriormente, o 21 de abril celebrarase un taller de expertos, e os días 23 e 30 realizaranse visitas ao Porto de Vigo.
Nas xornadas formativas trataranse temas como a ecoloxía costeira, a zonación de especies, os impactos ambientais e presións na costa e as solucións baseadas na natureza como ferramentas para o desenvolvemento sustentable.
Pola súa banda, no taller presentaranse os principais resultados obtidos ata o momento polo proxecto; e nas visitas, mediante unha retransmisión en directo dos fondos mariños, os asistentes poderán comprobar ‘in situ’ os traballos realizados na dársena da Laxe, en Vigo.
PROXECTO ‘PUERTALMAR’
‘Puertalmar’, que conta co apoio do Porto de Melilla, está financiado pola Fundación Biodiversidade, do Ministerio para a Transición Ecolóxica e o Reto Demográfico, a través do Programa Pleamar, cofinanciado polo Fondo Europeo Marítimo e de Pesca (FEMP).
O seu obxectivo é o desenvolvemento de sistemas que sirvan de apoio para a vida mariña, de forma que se consiga a recolonización de zonas costeiras que se viron afectadas as actividades industriais en contornas portuarias.
