Comisións Obreiras reclamou a posta en marcha do servizo de gardas de 24 horas nos partidos xudiciais da Coruña e Vigo, tendo en conta que esta iniciativa recibiu o visto e prace do Consello Xeral do Poder Xudicial (CGPJ) aínda que condicionado a que a Xunta e o Ministerio de Xustiza asuman o seu custo económico.
O coordinador do sector de Xustiza de CC.OO., Jorge Suárez, remarcou que, ante o beneplácito do organismo estatal, xa “non caben máis escusas nin tampouco se poden antepor intereses económicos aos criterios de servizo público”.
Tal e como remarcou, A Coruña e Vigo “son as únicas cidades do Estado con oito ou máis xulgados que carecen dun de garda as 24 horas, mantendo o sistema de gardas semanais”. “Isto impide unha xustiza eficaz e hábil”, asegurou.
Así, aseverou que esta situación “prexudica os letrados e mantén a sobrecarga de traballo do persoal público e dos xulgados preexistentes, pero tamén resulta lesivo para a cidadanía que acode aos tribunais”.
Neste sentido, criticou que a Xunta e Xustiza “antepoñen o interese económico á prestación dun servizo público esencial”, polo que lles instou a facer “unha rectificación pública inmediata” e realizar “as modificacións orzamentarias oportunas”. Finalmente, tamén pediu convocar de forma inmediata a mesa de negociación para tratar este asunto.
LUZ VERDE DO CGPJ
Segundo comunicou este xoves o Tribunal Superior de Xustiza de Galicia (TSXG), o Consejo General del Poder Xudicial (CGPJ) emitiu informe favorable á implantación do servizo de gardas de 24 horas nos partidos xudiciais da Coruña e Vigo, aínda que o condicionou a que a Xunta e o Ministerio de Xustiza asuman o seu custo económico.
Neste contexto, o TSXG apuntou que o Ministerio de Xustiza “se mostrou conforme coas novas quendas e disposto a asumir o seu custo, pero advertiu de que a autorización quedaría supeditada á dispoñibilidade orzamentaria, unha vez se proceda á aprobación da próxima Lei de Orzamentos Xerais do Estado”.
Pola súa banda, a Xunta, nun informe remitido ao CGPJ, manifestou que é “imposible” dispor neste momento dos recursos económicos necesarios para a posta en marcha deste sistema, xa que a crise sanitaria provocou “unha reorientación dos recursos cara á creación de novos órganos xudiciais”.
