O Goberno de Vigo habilitará zonas de aparcadoiro gratuítas nas inmediacións dos centros de atención primaria da cidade onde se está realizando a vacinación polo coronavirus.

Así o comunicou este mércores o alcalde, Abel Caballero, que indicou que xa deu instrucións á Policía Local para que habilite estes espazos de estacionamento nun “prazo breve, dun ou dous días”. Así, aínda que se trate de zonas de estacionamento regulado, “quedarán libres de ningún tipo de pago”.

Segundo indicou o rexedor, estes espazos poderán ser utilizados polas persoas que acudan a vacinarse, “sobre todo a xente maior”. Para iso, bastará con ensinar un documento ou unha mensaxe no que conste a cita.

Caballero lembrou que a vacinación se realiza no Instituto feiral de Vigo (Ifevi), onde hai aparcadoiro gratuíto; nalgúns centros de atención primaria; e no Hospital Álvaro Cunqueiro. Respecto ao centro hospitalario, remarcou que “hai un aparcadoiro gratuíto do Concello”, pero “a Xunta cobra por aparcar” no seu, polo que instou á Administración galega a que “poña gratis” este estacionamento.