Axentes da Policía Local de Vigo denunciaron a un veciño da cidade de 37 anos por conducir baixo os efectos das drogas nun vehículo sen seguro obrigatorio e coa ITV caducada. A Policía Local informou de que os feitos ocorreron sobre as 12,00 horas deste domingo, no marco dos labores de control e vixilancia en materia de seguridade viaria que realizaba unha patrulla na zona de Cánovas do Castelo.

Os axentes comprobaron na base de datos que un vehículo que observaran circulando carecía de seguro obrigatorio e tiña a ITV caducada. Por iso, procederon a darlle o alto ao condutor. Así, decatáronse de que presentaba “signos” de consumir sustancias estupefacientes, polo que lle realizaron a proba de drogas, na que deu positivo no consumo de cocaína.

Como resultado de todo iso, o home, de siglas P. R. V. foi proposto para sanción por consumo de estupefacientes e formuláronselle senllas denuncias administrativas por carecer de seguro e de ITV en vigor.