Axentes da Policía Nacional da Comisaría de Vigo detiveron a un veciño da cidade, de 37 anos de idade, como presunto autor dun delito de tráfico de drogas, que actuaba na zona de Pizarro.
Segundo informaron fontes policiais, a investigación iniciouse por mor de denuncias cidadás e por outras intervencións policiais anteriores, das que se tivo coñecemento da posible existencia dun ‘punto negro’ de venda de drogas na zona de Pizarro.
A Policía estableceu un dispositivo de vixilancia, e comprobou como o suposto vendedor se citaba cos seus ‘clientes’ en diferentes puntos, adoptando medidas de precaución para eludir a acción policial.
Froito destas investigacións, os axentes localizaron ao presunto traficante á primeira hora da tarde deste domingo, cando chegaba camiñando á Praza de Isabel a Católica. Alí, dous mozos achegáronselle e, tras unha breve conversación, realizaron un intercambio antes de abandonar o lugar.
Os funcionarios interceptaron ao sospeitoso, que foi identificado e ao que cachearon, atopando entre as súas roupas cocaína e haxix, diñeiro en efectivo, unha báscula de precisión e outros útiles para a venda de drogas. O home foi detido e trasladado a Comisaría, onde se lle tomou declaración, antes de pasar a disposición do xulgado de instrución 4 de Vigo.
