A Consellería de Sanidade xustificou que as dúas ambulancias de soporte vital básico do 061 que dan cobertura á comarca do Morrazo (unha con base en Cangas e a outra en Moaña) se desinfectan despois dos servizos en Vigo para gañar tempo, pois son os hospitais Álvaro Cunqueiro e Povisa onde trasladan aos pacientes.

Así o dixo o titular de Sanidade, Julio García Comesaña, en resposta a unha pregunta oral formulada polo deputado do BNG Paulo Ríos, que instou á Xunta a ampliar a frota de ambulancias nesta comarca pontevedresa ante o “desborde” do servizo.

O conselleiro asegurou que en 2020 as dúas ambulancias do Morrazo realizaron 328 servizos menos que o ano anterior, con medias diarias de 8,66 saídas na de Cangas e 4,50 na asentada en Moaña.

Segundo os datos expostos polo titular do ramo, o rango de atención na comarca está “nos últimos tres anos” nos 10 minutos por dúas ambulancias que supoñen un cociente dunha por cada 26.000 habitantes.

Por último, fronte ás críticas do BNG por que a desinfección das ambulancias tras prestar un servizo se faga en Vigo, García Comesaña asegurou que este procedemento de limpeza “no punto de uso”, implantado por mor da pandemia, faise para que a unidade estea “operativa” canto antes, pois é nos principais hospitais vigueses onde conclúen os servizos.