A Xunta de Goberno Local do Concello de Vigo aprobou as normas para a adxudicación de prazas e matrícula nas nove escolas infantís municipais (EIM) para o próximo curso, incluída a EIM Santa Marta.
Segundo comunicou este luns o concelleiro de Educación, Gorka Gómez, para o curso 2021/2022 ofertaranse 675 prazas nas escolas de Atalaia, Bembrive, Bouzas, Mestres Goldar, Costeira de Saiáns, Navia, Santa Cristina, Santa Marta e Tomás Alonso. Así, informou de que o prazo de presentación de solicitudes arrinca este mesmo luns, 22 de marzo, e prolongarase ata o 9 de abril.
Tal e como manifestou, a estas nove escolas infantís o Goberno local destina “máis de dous millóns de euros”. Con iso, subliñou, o Concello vigués “segue coa súa aposta decidida pola educación”.
ESCOLA SANTA MARTA
Debido ás obras de urbanización de Barrio do Cura, os nenos do centro Santa Marta serán recolocados no edificio do Instituto Municipal de Educación, segundo anunciou hai días o alcalde, Abel Caballero, tras fracasar o seu intento de levar a escola ao CEIP Ramón e Cajal pola negativa da Xunta e do propio colexio.
Nas últimas semanas a Federación Olívica de Anpas (Foanpas) protagonizou varias protestas polo traslado da escola infantil. O alcalde, pola súa banda, mantivo que a decisión de trasladar o centro ao Instituto Municipal de Educación é “irreversible”.
