O grupo municipal Marea de Vigo alertou este mércores da “necesidade perentoria” de implementar políticas integrais contra a violencia de xénero ante o número de casos atendidos pola Policía Local da cidade, 184 desde principios de 2020.

A concelleira Oriana Méndez lamentou que Vigo careza dun observatorio municipal contra a violencia de xénero, algo que xa existe noutros concellos galegos e no Estado, para analizar como se manifesta e como evoluciona esta violencia contra as mulleres na cidade, para poder mellorar as intervencións sociais, tanto preventivas como asistenciais.

Por outra banda, criticou, o Concello olívico tampouco dispón dun plan integral contra a violencia de xénero que planifique a loita contra as violencias machistas en “o tres eixos fundamentais” que, ao seu xuízo, son “a prevención, xunto á formación e sensibilización; a detección e acción integral; e a coordinación interinstitucional para optimizar a execución das medidas planificadas”.

Segundo Oriana Méndez, as partidas consignadas no orzamento municipal vigués para a loita contra a violencia de xénero “son desgraciadamente irrisorias e nin se executan”, unha situación que non se pode explicar só pola pandemia de COVID, senón que “xa vén de antes”.

Finalmente, a concelleira de Marea de Vigo engadiu que tamén é fundamental garantir unha vivenda estable ás vítimas e aos seus fillos, e facer efectivos os acordos da moción aprobada en 2017, sore a adhesión de Vigo á rede de cidades libres de trata. A ese respecto, reclamou a creación dunha unidade de traballo social especializada para mulleres prostituídas, que poida apoialas para saír da súa situación e cubrir as súas necesidades de vivenda e alimentación.