Xustiza iniciará, a partir de xullo próximo, o trasladado das unidades xudiciais de Vigo ás novas instalacións, no reformado edificio do antigo Hospital Xeral da cidade, segundo avanzou este martes o vicepresidente do goberno galego e conselleiro de Presidencia, Xustiza e Turismo, Alfonso Rueda.

En declaracións aos medios en Vigo, Rueda explicou que, cara ao mes de xuño, estará lista a planificación do traslado desde as actuais instalacións xudiciais da rúa Lalín. Dito trasladado comezará no mes de xullo, e farase “por unidades xudiciais” e por xurisdicións, tendo en conta que “os prazos da administración de xustiza non se poden parar” . “Vai ser un traslado complicado, porque son moitas unidades xudiciais”, recoñeceu o vicepresidente, que tamén apuntou que “dependerá de como estean os señalamientos”.

Rueda lembrou que a obra da nova Cidade da Xustiza xa entrou na súa fase final e que, neste momento, está a traballarse na licitación de dotacións como mobiliario, sistemas de arquivo ou equipos informáticos.

O conselleiro fixo estas declaracións durante unha visita ao edificio coñecido como ‘Gota de Leche’, onde se instalará de forma provisional o novo xulgado do Social (o número 7), e onde xa funciona un xulgado de Familia (Primeira Instancia 15). A nova unidade estará en funcionamento a finais de marzo, a pesar da alternativa exposta polo Goberno que, segundo Rueda, pretendía atrasar ata finais de xullo a posta en marcha deste xulgado, así como dos novos xulgados do Social de Lugo e A Coruña.

O xuíz decano de Vigo, Germán Serrano, que acompañou ao vicepresidente na súa visita, agradeceu a posta a disposición destas instalacións e apuntou que, aínda que se trate dunha sede provisional (en tanto non se complete o traslado á nova Cidade da Xustiza), “cumpre sobradamente os estándares de dignidade”.