A área Sanitaria de Vigo puxo en marcha a primeira unidade multidisciplinar de soporte nutricional de Galicia, e unha de “as poucas deste tipo” que funcionan en España, co obxectivo de satisfacer as necesidades nutricionais de pacientes con diversas patoloxías ou problemas de saúde.

Segundo informou o Servizo Galego de Saúde (Sergas), esta iniciativa nace por parte dos servizos de Farmacia Hospitalaria e de Endocrinoloxía, que buscan dar cobertura mediante unha atención preventiva e terapéurica a pacientes hospitalizados e ambulatorios relacionados co Servizo de Endocrinoloxía ou para os que se solicite unha interconsulta.

O traballo asistencial ofrecerase tanto no Hospital Álvaro Cunqueiro como no Meixoeiro, e desenvolverase en “estreita colaboración” cos centros de saúde e cos distintos servizos de hospitalización da área sanitaria. En total, na unidade colaborarán máis dunha vintena de profesionais de diversas categorías.

A coordinadora desta nova unidade, a xefa do servizo de Farmacia Hospitalaria, Guadalupe Piñeiro, destacou que este servizo “é fundamental para que os pacientes con distintas doenzas en domicilio ou hospitalizados poidan dispor dunha pauta nutricional que lles sirva para recuperarse e mellorar a súa calidade de vida”.

O Sergas indicou que no último ano na área Sanitaria de Vigo se atenderon case 4.800 pacientes con pautas nutricionais –dos que 724 recibiron nutrición intravenosa e o resto tiveron sorporte nutricional a través de sonda nasogástrica–, e realizáronse case 17.000 consultas externas.