Distribuír produtos porta por porta e a unha temperatura e condicións moi controladas. Esa viría sendo a aplicación da nova tecnoloxía que unha multinacional implantará na península e que contará coa súa principal delegación en Vigo. A empresa en cuestión, DBSchenker, estaría a ultimar un sistema que garante a conservación “durante un tempo prolongado” de mercadorías con “requisitos extremos ou moi esixentes”, como poderían ser alimentos conxelados ou produtos farmacéuticos.
Nos últimos meses, a opinión pública asistiu a un desfile de vacinas nos que se foi explicando as circunstancias necesarias para manter operativas cada unha destas sen ‘romper a cadea de frío’. Así ben, a tecnoloxía ‘Reefer’ desenvolta por DBSchenker podería servir para transportar algunhas dos doses dispoñibles ata agora, xa que garante a conservación estable de mercadorías entre -27º e 30º.
Pero, cales son as diferenzas entre o sistema que comezará a operar en toda a península a partir da súa planta de Vigo e un modelo de refrixeración normal? Que, neste caso, a conservación nunha atmosfera controlada é desenvolta de xeito individual, é dicir, adaptado ás circunstancias e necesidades de cada produto concreto, no canto de ter nunha mesma situación climatolóxica a todos os items dun stock. É o que se chama a solución da ‘atmosfera controlada’, que segundo apunta a empresa seriviría para “preservar os produtos en tránsito en todo momento” e “ofrecer unha cadea de frío continua”.
