O Partido Popular de Vigo presentou na mañá deste mércores unha pregunta para que a Xerencia de Urbanismo do Concello de Vigo informe acerca de cantos edificios da cidade teñen unha orde de demolición pendente de execución.
Esta petición prodúcese despois de que un edificio en ruínas se derrubase o pasado xoves na rúa República Arxentina; a colación do que o Goberno de Vigo sostivo que a Xunta tardou oito anos en aprobar a demolición e o responsable da propiedade levaba “oito meses cos brazos cruzados”.
Neste contexto, o PP vigués, que tamén solicitou acceso electrónico a todos os expedientes relativos ao edificio derrubado, criticou que o Goberno local bote “balóns fóra” e culpe “a outros do derrube”. “A responsabilidade é do Concello”, selou.
Doutra banda, o grupo popular tamén presentou preguntas para coñecer a ocupación nas vivendas sociais municipais e para que se explique por que non se exime á hostalaría do pago de impostos municipais ante as restricións pola pandemia.
