As probas con test de antíxenos realizadas en Vigo este fin de semana, e que se enmarcan nun cribado masivo nesta área sanitaria, detectaron 11 casos positivos de COVID-19, segundo confirmaron fontes do Sergas.

Así, a área sanitaria iniciou o pasado venres un cribado para o que se van a citar a unhas 27.000 persoas (cinco mil máis das inicialmente previstas), que deberán acudir ao Instituto Feiral de Vigo (Ifevi) a someterse ao test de antíxenos.

Entre o venres e o domingo estaban citadas 13.805 persoas, das que acudiron ao Ifevi case 8.500 (un 61,5 %). Entre os que acudiron detectáronse 11 positivos e, segundo lembrou Sanidade, as probas continuarán ata este mércores.

Este cribado está a levarse a cabo mediante probas de antíxenos, que se realizan tomando mostras nasofarínxeas e que permiten obter os resultados nun tempo curto, duns 15 ou 20 minutos, de maneira que as persoas que dan positivo son informadas xa nese momento, e dánselles as indicacións pertinentes.

Segundo os datos comunicados este luns polo Sergas, a área sanitaria de Vigo conta cun total de 3.798 casos activos de COVID-19, dos que 24 son pacientes ingresados en UCI e 166 ‘en planta’.