A Policía Local de Vigo detivo por un delito de atentado a un home que golpeou a un axente cando tratou de evitar que entrase cunha conduta agresiva na vivenda na que convivía coa súa parella e un menor.

Tal e como informou a Policía Local, os feitos ocorreron pasadas as 22:00 horas do pasado xoves, día 21, cando unha muller informou de que estaba a manter unha forte discusión coa súa parella nun domicilio da rúa Marqués de Valterra.

Unha patrulla desprazouse ata o lugar, onde atopou nas escaleiras un home que presentaba unha ferida na cella esquerda. Despois de que os axentes lle ofrecesen atención sanitaria, á que se negou, o home manifestou que ao chegar ao seu domicilio a súa parella non lle deixou entrar na residencia.

Os efectivos falaron entón coa muller, que indicou que o home, co que convive e co que mantén unha relación desde hai catro anos, ponse agresivo cando consome alcol. Así, ao decatarse de que estaba bebido, decidiu impedirlle o acceso á vivenda “por medo” e “para protexer ao seu fillo de seis anos”.

Ao terminar a entrevista, o home tentou novamente acceder pola forza ao domicilio, ante o que os axentes lle pediron que se tranquilizase. A pesar diso, o home, que non utilizaba máscara nin respectou a distancia de seguridade, mantivo unha “conduta agresiva e de desobediencia sistemática” pola que chegou a golpear a un dos axentes para tratar de apartalo da porta da vivenda.

Por todos estes feitos, procedeuse á detención por un delito de atentado do home, de iniciais M.M.G., veciño de Redondela de 58 anos de idade, para o seu posterior posta a disposición xudicial.