A Garda Civil incautouse de máis de 100 pezas de roupa deportiva —camisetas, pantalóns e sudaderas–, supostamente falsificada, nun dos postos do mercadillo ambulante de Bueu, en Pontevedra.

O valor das falsificacións, segundo estimou o instituto armado, supera os 6.000 euros. Segundo o relato policial, os feitos tiveron lugar o luns 18 de xaneiro durante un dispositivo especial co que se pretendía controlar a venda de pezas e outros produtos falsificados no mercadillo.

Nun dos postos inspeccionados, a Garda Civil comprobou como se expuñan pezas de diferentes marcas deportivas con etiquetas, supostamente falsificadas, de firmas comerciais acreditadas.

O responsable do posto, ecuatoriano e veciño de Cangas do Morrazo, non puido acreditar a procedencia da partida de roupa nin presentar as autorizacións necesarias para a comercialización de produtos de marcas rexistradas, polo que se lle imputou un delitocontra a propiedade industrial.

A mercadoría intervida, así como as dilixencias instruídas, xa foron postas a disposición do Xulgado de garda de Marín.