O alcalde de Vigo, Abel Caballero, urxiu este venres ao Goberno galego a “aceleración” do proceso de vacinación ante o aumento de casos de COVID-19 rexistrado nos últimos días. Nunha rolda de prensa celebrada en Vigo, o rexedor olívico solicitou á Xunta que “acelere” o proceso de vacinación dado que leva a cabo “lentamente” e asegurou que “non lle consola” que noutros territorios de España estea a ter lugar máis amodo.
Neste sentido, Abel Caballero incidiu na necesidade de que o Goberno galego “deseñe un plan” para este proceso e remarcou a importancia de que se administren “todas (as vacinas) que cheguen”. “Eu quérolle dicir á Xunta de Galicia que ten que acelerar a administración de vacinas. Están a ir lentos. É certo que (o dato de vacinación) non é dos peores de España, pero eu quero ver á Xunta nos mellores de España administrando vacinas”, insistiu o alcalde de Vigo.
Así mesmo, concretou que a incidencia acumulada rexistrada en Vigo nos 14 días anteriores ao 6 de xaneiro situouse en 178,7 novos casos por cada 100.000 habitantes, o que representa un aumento de 1,3 puntos respecto ao día anterior. Así, lembrou que ese foi o segundo día consecutivo no que a incidencia acumulada subiu, fronte aos descensos observados en días anteriores.
Aínda que recoñeceu que “o dato na cidade de Vigo non é bo”, apuntou que se trata de “un lixeiriño incremento”, mentres que a subida no resto da área sanitaria foi “moi forte”, dado que se elevou en 17,8 puntos respecto ao día anterior. Por iso, chamou a “extremar a prudencia en todas partes” e a “fuxir” das reunións familiares e con amigos.
