O Porto de Vigo confía en recuperar progresivamente os tráficos desviados á terminal portuguesa de Leixôes (estimados entre 40.000 e 50.000 toneladas), agora que as inspeccións nese porto luso “son máis rigorosas”.

Así o expresou o presidente da Autoridade Portuaria de Vigo, Enrique López Veiga, nunha comparecencia de prensa celebrada trala reunión mensual do Consello de Administración do Porto, na que lembrou que a terminal olívica iniciou unha serie de “accións” ante a perda de tráficos, sobre todo de pesca conxelada, motivada en gran medida pola rixidez dos protocolos no PIF.

Ademais da elaboración dun novo protocolo de inspección “máis sinxelo”, o Porto de Vigo exerceu “presión” ante as autoridades europeas, de maneira que agora as inspeccións en Leixoês son “máis rigorosas”.

“A Comisión empezou a responder e nótase”, aseverou e apostou por “volver recuperar a confianza” dos empresarios que se foron, como paso previo á recuperación deses tráficos.

TRÁFICOS DE MAIO

Na rolda de prensa deste venres, López Veiga deu a coñecer tamén as cifras de tráficos do pasado mes de maio, así como os resultados de explotación a estas alturas de ano e a contabilidade analítica do Porto.

Segundo informou, o tráfico xeral da terminal viguesa creceu un 8,5 por cento o pasado mes, con respecto a maio do ano 2017, alcanzando as 390.691 toneladas, e acumula un crecemento interanual do 6,5 por cento.

Incrementouse o tráfico de pesca conxelada en case un 12%, debido a que é temporada da frota de Malvinas, e o tráfico de automóbiles subiu un 3,12%. Tamén rexistraron subidas importantes os tráficos de aceite de peixe (721,62%), granito en bruto (53,75%), ou metais e as súas manufacturas (80,76%).

En canto aos resultados económicos, López Veiga confirmou que o resultado de explotación do Porto a maio de 2018 é de 703.400 euros, mentres que no mesmo mes do ano pasado era de 259.100 euros.