O Concello de Vigo presentou as súas alegacións ao documento da Delimitación de Usos e Espazos Portuarios (DUEP), no que propón máis desafecciones para ceder espazos á cidade e expresa o seu “rexeitamento total” a máis recheos na ría.
Así o trasladou en rolda de prensa o alcalde, Abel Caballero, que sinalou que, entre outras cuestións, o plan DUEP da Autoridade Portuaria “oculta a previsión de recheos”. En todo caso, insistiu respecto diso en que o goberno local non acepta ningún tipo de recheo na ría, “nin pilotado nin compacto”, á vez que reclamou ao organismo portuario “unha análise detallada das súas necesidades e espazos actuais”.
Por outra banda, indicou que as desafecciones previstas na DUEP son “manifestamente insuficientes”, xa que só se contempla a cesión de espazos axardinados de Areal e a EDAR de Teis. O Concello propuxo que, ademais deses, o Porto ceda á cidade instalacións dotacionais e educativas de Bouzas (as parcelas do campo do Rápido, do centro de maiores, do instituto de Audiovisuais, da sede do Instituto de Investigacións Mariñas, e o espazo do pavillón), así como espazos verdes e aparcadoiros.
Tamén expón a cesión da Avenida de Beiramar, que propón sexa soterrada (que se contrúa un túnel para o tráfico rodado) e os espazos entre esa avenida e Jacinto Benavente, que están “en situación calamitosa”; a zona central lúdico-portuaria; e a praia de Mende, á beira da EDAR de Teis.
O Concello tamén reclama, nas súas alegacións, que se aclare o uso dos espazos do antigo estaleiro Vulcano e a ampliación do dominio portuario a espazos da cidade, á vez que advirte de que a Autoridade Portuaria debe “dicir como resolve os accesos” ao porto deportivo da Lagoa.
Abel Caballero criticou tamén que o documento portuario non incorpore a Plataforma Loxística de Salvaterra-As Neves (Plisan), ou unha “reflexión” sobre os accesos á terminal de Guixar desde a autoestrada.
“INMENSO ERRO”
Finalmente, o alcalde censurou que o Porto pretenda modificar os usos no seu espazo na chamada ‘curva de San Gregorio’, na zona dos estaleiros, e advertiu de que esa parte da Avenida de Beiramar “ten que seguir sendo unha xanela ao mar”. Caballero expresou a súa confianza en que o Porto atenda as alegacións do Concello e “non cometa o inmenso erro” de aprobar un documento de DUEP “contra a cidade”. “É un plan de usos con moi serias deficiencias. Confío en que o Porto non cometa o inmenso erro de aprobalo se atender o que di o Concello”, incidiu o rexedor.
