Os cribados realizados polo Sergas nos últimos días para detectar casos asintomáticos de persoas contaxiadas de COVID-19 nos municipios de Tui e Redondela, e no Centro Integrado de Formación Profesional Manuel Antonio de Vigo arroxaron un total de 23 casos positivos.

Así o confirmaron fontes de Sanidade, que precisaron que, no cribado de Tui, para o que se citou a 2.500 persoas e acudiron 1.754 (un 70,16 %), detectáronse 4 casos positivos.

En Redondela que, do mesmo xeito que Tui, presenta unha alta incidencia de coronavirus, citouse a 3.000 persoas e fixéronse a proba 1.509 (un 50,3 %). Nese caso, o número de contaxiados asintomáticos detectado foi de 6.

Finalmente, no CIFP Manuel Antonio de Vigo, onde se convocou a 1.620 persoas para facer os test, foron cribadas 951 (un 58,7 %) e detectáronse 13 casos positivos.

O Sergas está a realizar cribados, así mesmo, entre a poboación de Moaña (onde a incidencia do COVID aumentou) e de Vigo. No caso do municipio do Morrazo, Sanidade pretende estender as probas á totalidade de poboación maior de 15 anos (case 20.000 veciños), mentres que en Vigo xa se fixeron probas a miles de pacientes dos centros de saúde de Sárdoma, Lavadores, A Dobrada, Pintor Colmeiro, rúa Cuba, Rosalía de Castro e Casco Vello, aínda que os tests continuarán.