O alcalde de Vigo, Abel Caballero, recoñeceu este luns non estar “entusiasmado” co nomeamento de Jesús Vázquez Almuíña como presidente do Porto olívico, e lamentou que “non chega cos mellores avais” tras o seu paso pola Consellería de Sanidade, que criticou.
Nunha rolda de prensa, o rexedor (que non asistiu ao acto de toma de posesión de Vázquez Almuíña o pasado venres) referiuse a a sentenza do Tribunal Superior de Xustiza de Galicia, que dá a razón á concesionaria do Hospital Álvaro Cunqueiro de Vigo, e obriga ao Sergas a abonarlle case 6 millóns de euros pola diferenza no IVE aplicado ao canon (a administración aplicaba un IVE inferior ao 21 %).
Ao fío desa resolución, Abel Caballero volveu a insistir en que o hospital vigués é “privado” e, ademais, agora o accionista maioritario é un fondo francés “que só busca o seu propio beneficio”.
“Quen está detrás deste disparate e esta agresión a Vigo? Feijóo, que foi o ideólogo; Elena Muñoz, agora premiada sendo senadora; e Vázquez Almuíña, que foi conselleiro nos últimos anos, cando non se pagou o que había que pagar”, proclamou o alcalde, e criticou que parece haber unha oferta para os representantes do PP: “Que veñan os que agriden a Vigo, que Feijóo os premiará logo con cargos”.
A todo iso súmase o feito de que, incidiu, Vázquez Almuíña negouse a facilitarlle información sobre a evolución da pandemia de COVID en Vigo. “O último que lembro del é que non nos daba a información, mentres que o novo conselleiro dánola toda”, sinalou e apostilou que, con eses antecedentes e ese “pésimo aval”, o goberno local “non está entusiasmado” coa súa chegada ao Porto.
