O 14% dos Peugeot e-2008 fabricados na planta do Grupo PSA de Vigo posúe unha mecánica 100% eléctrica, que dispón de 310 quilómetros de autonomía ‘cero emisións’, 136 cabalos de potencia e 434 litros de maleteiro.
“A finais de 2019, o Centro de Vigo abría unha nova etapa na súa longa experiencia na fabricación de vehículos electrificados co lanzamento da produción do Peugeot e-2008, un todocamino co que a planta se estreaba coa plataforma multienerxía CMP. Pasou pouco máis dun ano deste fito e o Peugeot e-2008 representa xa un 14% da produción total do modelo”, subliñou o director da planta galega, Ignacio Bo.
Neste sentido, Bo destacou o “éxito” desta variante e das instalacións do grupo, que poden adaptarse á demanda de coches ‘cero emisións’ grazas á flexibilidade das plataformas multienerxía.
“Hoxe, un de cada sete novos Peugeot e-2008, que se fabrican en exclusiva mundial en Vigo, pertence a esta variante eléctrica, unha cifra que está destinada a crecer. España non se pode quedar atrás nesta revolución eléctrica. Ademais do Plan Moves II, hai que investir en puntos de carga e infraestrutura para este tipo de vehículos”, declarou o director xeral de Peugeot para España e Portugal, Joao Mendes.
Con 4,60 metros de lonxitude, 2,60 metros de distancia entre eixos e 434 litros de maleteiro, o Peugeot e-2008 é “toda unha referencia en materia de espazo interior” no seu segmento. Con 310 quilómetros de autonomía, pode circular fóra da contorna urbana.
