A Xunta defendeu este luns a súa “dilixencia” na tramitación da obra de ampliación do Instituto Feiral de Vigo (Ifevi), que contrapuxo ao “atraso de 8 meses” nos informes do Goberno central.
Así o trasladou a delegada territorial do goberno galego, Marta Fernández Tapias, tras manter unha reunión coa directiva da asociación Conxemar para analizar a situación desa obra de ampliación, cuxo interese xeral xa foi aprobado polo Consello da Xunta.
Fernández-Tapias sinalou que a administración autonómica está en condicións de licitar xa a obra, en canto o Concello de Vigo poña á súa disposición os terreos, e lembrou que, xa o pasado mes de marzo, a Xunta tiña “todo listo” para licitar os traballos, pero non recibiu o último informe do Goberno de España ata o pasado 20 de outubro.
Segundo subliñou, en pouco máis dun mes o expediente elevouse á Comisión Superior de Urbanismo, como paso previo preceptivo antes do seu visto e prace polo Consello da Xunta, o pasado xoves. “A Xunta non perdeu nin un só minuto en traballar para ter en tempo e forma os informes necesarios para cumprimentar o expediente. De marzo a outubro estivemos a esperar polo Goberno central”, apuntou a delegada.
Finalmente, trasladou a súa esperanza de que o proxecto de ampliación “non sufra máis atrasos” e instou ao Concello a expropiar os terreos para licitar as obras. Así mesmo, lembrou que, desde o ano 2005, a Xunta investiu no Ifevi máis de 15 millóns de euros, aos que se sumarán os 7,65 millóns previstos para a nova ampliación.
“O IFEVI NON É DELES”
Pola súa banda, o alcalde de Vigo, Abel Caballero, nunha rolda de prensa, cuestionou que a delegada territorial da Xunta mantivese unha reunión coa directiva de Conxemar. “Dígolles unha cousa aos da Xunta: o Ifevi non é deles, é unha institución autónoma (…), o que amplía é o Ifevi”, subliñou o rexedor.
Tras volver acusar ao goberno galego de “atrasar” a obra de ampliación, Caballero asegurou que “a Xunta non quería ampliar” o recinto feiral vigués. “Pero obrigámoslle, porque Zona Franca dixo que o pagaba se era preciso”, engadiu, e confirmou que o Concello xa puxo en marcha “en dúas horas” o proceso para as expropiacións.
