O alcalde de Vigo e presidente da Federación Española de Municipios e Provincias (FEMP), Abel Caballero, reclamou este xoves que haxa un “acordo” e unha “posición común” sobre as medidas que se adoptan no marco da pandemia de COVID e ante a proximidade do Nadal, á vez que advertiu de que “algunhas declaracións” realizadas por dirixentes “deben ser meditadas”.
Nunha rolda de prensa, o rexedor olívico sinalou a importancia de que haxa “acordos” nesta situación, unha posición que xa trasladou no Consello Interterritorial de Sanidade, aínda que matizou que os acordos “poden depender do estado de cada Comunidade Autónoma”, xa que a evolución da pandemia non é igual en todas. “Creo que lle debemos aos cidadáns un acordo e unha posición común e compartida, eu pedín ese esforzo”, afirmou.
Ademais, sinalou que as autoridades sanitarias “antes de tomar unha decisión” e determinados dirixentes, deben “meditar as súas opinións antes de dalas”. “E non me refiro ao conselleiro de Sanidade“, subliñou o alcalde.
Abel Caballero fixo esta consideración tras dar a coñecer a evolución da incidencia do COVID na cidade de Vigo e na área sanitaria. Segundo indicou, a urbe olívica segue “dobrando seriamente o pulso” á pandemia, e baixou a incidencia nos últimos días ata os 321,7 casos por 100.000 habitantes (calculados sobre os últimos 14 días).
Por contra, sinalou, a evolución da área no seu conxunto é peor, e tamén ocorre o mesmo co resto de municipios (deixando Vigo fóra). Todo isto, matizou, “dito con agarimo e sen demonizar a ninguén”.
O alcalde constatou que o “sacrificio” de ter restricións, un peche perimetral e a hostalaría pechada “está a dar resultado” en Vigo e pediu aos cidadáns “manter o esforzo”.
