A área sanitaria de Vigo rexistrou 41 novos contaxios de coronavirus confirmados por PCR en 24 horas, o que implica unha estabilización ao subir en tan só un con respecto aos notificados a xornada anterior. Con todo, Vigo mantense como a área sanitaria que reúne a maior cifra de casos activos: un total de 2.209, aínda que son 51 menos que o luns. A veciña Pontevedra é a que se manten á cabeza co maior número de novas infeccións.

En canto á positividade dos test realizados, Vigo é a única que consegue baixar, e moito, do limiar do 5% establecido pola Organización Mundial da Saúde para dar por controlada a pandemia, xa que só un 2,2% das PCR deron positivo no último día.

HOSPITALIZACIÓNS

O distrito sanitario de Vigo non rexistrou cambios no número de ingresados, que se sitúa en 99, dos que 23 se atopan en UCI –dous menos–.  No conxunto de Galicia, os hospitalizados por COVID-19 baixaron en sete ata situarse en 552, dos que 96 se atopan en Unidades de Coidados Intensivos (UCI) –catro menos–.

GALICIA

Galicia rexistrou 327 novos contaxios de coronavirus confirmados por PCR en 24 horas, o que implica, igual ca en Vigo, unha estabilización no número de casos diarios.