A Policía Local de Tui tramitou sancións a seis persoas que incumpriron as restricións establecidas para conter o avance da pandemia da COVID-19 durante este fin de semana.
Fontes do goberno local precisaron que se sancionou a estas persoas por incumprir o toque de queda –vixente na comunidade entre as 23,00 e as 6,00 horas–, non respectar o peche perimetral da localidade e viaxar nun mesmo vehículo a pesar de non ser convivientes.
Así mesmo, os axentes controlaron máis de 500 vehículos na contorna da antiga ponte internacional e outros puntos da localidade para vixiar o cumprimento do peche de perimetral da mesma, en vigor desde o pasado sábado. Deste xeito, os policías informaron das novas medidas establecidas a condutores procedentes de Portugal.
Tamén recibiron múltiples consultas telefónicas desde Galicia e Portugal sobre as medidas establecidas, o que provocou o colapso da liña móbil e fixa da Policía Local.
Por outra banda, pasadas as 23,00 horas deste sábado, os axentes deron o alto a dous vehículos cuxos condutores arroxaron resultados positivos no control de alcoholemia que triplicaban e duplicaban a taxa máxima permitida e incumpriron o toque de queda.
