A Xunta formalizou a adxudicación de tres parcelas na Plisan, en Salvaterra de Miño, á empresa conserveira Hijos de Carlos Albo. Segundo informa o Goberno galego, prodúcese como resultado da poxa pública convocada polo Instituto Galega de Vivenda e Solo (IGVS) o ano pasado, no que lle correspondeu á firma galega unha superficie de 63.000 metros cadrados. Tamén se adxudicaron outras dúas parcelas, que suman preto de 5.600 metros –ata uns 69.000 metros cadrados–.

A adxudicación realizouse en dereito de superficie, unha modalidade que permite ás empresas acceder ao chan pagando cada ano unha pequena cantidade, o que lles facilita financiar a súa instalación e o inicio da actividade nas mellores condicións posibles, explica a Consellería de Medio Ambiente.

En concreto, supón o pago dun canon anual do 1,5% do prezo da parcela durante os dous primeiros anos; do 2,5% do prezo nos anos terceiro e cuarto; e do 3,5% do prezo a partir do quinto ano.

O dereito de superficie concédese por un prazo de 30 anos e ao finalizar este período, as entidades promotoras da Plisan, mediante acordo unánime e previa petición do adxudicatario, poderán conceder ata un máximo de tres prórrogas sucesivas, cunha duración de 10 anos cada unha, de maneira que o dereito de superficie poderá estenderse ata un máximo de 60 anos.