A secretaria xeral de Pesca, Alicia Villauriz, apostou por colaborar co Porto de Vigo para impulsar o crecemento azul no sector pesqueiro a nivel nacional.
Así o trasladou ao presidente da Autoridade Portuaria, Enrique López Veiga, durante unha reunión por videoconferencia na que se abordaron actuacións levadas a cabo en conxunto para favorecer o desenvolvemento do sector pesqueiro no ámbito do crecemento azul.
Tal e como trasladou o Ministerio de Agricultura, Pesca e Alimentación, tamén estudaron novas oportunidades de colaboración nesta materia.
Este encontro enmárcase no comité de seguimento establecido en Protocolo de colaboración entre ambas as institucións para impulsar o crecemento azul no sector pesqueiro do Cantábrico Noroeste.
En concreto, este convenio busca favorecer a identificación de actividades con potencial de desenvolvemento económico, a creación de espazos de coñecemento e o estudo da compatibilización de usos no espazo marítimo.
Así, analizouse o taller internacional de portos pesqueiros azuis celebrado esta semana de modo virtual pero con sede en Vigo e que foi promovido pola Organización de Nacións Unidas para a Alimentación e a Agricultura (FAO).
No marco do taller, expúxose a creación dunha rede de portos azuis da FAO e que o Porto de Vigo contemplaría albergar o proxecto de coordinación dos traballos realizados por esta entidade.
A secretaria xeral de Pesca valorou esta información e mostrouse disposta a colaborar co Porto de Vigo nesta e outras actuacións de impulso do crecemento azul no sector pesqueiro español.
