O presidente da Xunta, Alberto Núñez Feijóo, avogou este venres por ampliar a Estratexia de desenvolvemento transfronteirizo coa inclusión do tren de alta velocidade Vigo-O Porto, un maior compromiso co Corredor Atlántico e a posta en valor do Camiño Portugués.
“Estamos a falar dunha Estratexia útil pero na que botamos de menos varias cuestións, como que se poña en valor o Camiño Portugués, fundamental para seguir unindo a Eurorrexión”, esgrimiu o mandatario galego na súa intervención no debate ‘Europa sen fronteiras: o papel da cooperación transfronteiriza na consolidación do proxecto europeo’, no marco do ‘II Xornadas Amizade Cerveira-Tomiño’.
Feijóo tamén aludiu á necesidade de plasmar un maior compromiso co Corredor Atlántico de mercadorías, fundamental para todo o norte de Portugal e para todo o noroeste de España, co fin de poder competir con outros corredores como o Mediterráneo; e a inclusión do tren de alta velocidade entre Vigo e O Porto.
Respecto diso deste punto, puxo en valor a decisión do Goberno portugués de inxectar fondos á liña de alta velocidade desde Valença ata Braga.
REIVINDICA A IMPORTANCIA DE EUROPA
Na súa intervención, o presidente galego tamén reivindicou a importancia de Europa como “proxecto político, social e de convivencia”, así como o papel das eurorrexións como ecosistemas económicos, sociais, culturais, sanitarios e de emerxencias.
Sobre este último punto, lembrou os traballos desenvolvidos pola Eurorrexión Galicia-Norte de Portugal coa elaboración do Plan de reactivación da cooperación transfronteiriza, que serviu en parte de base á Estratexia.
“Fomos útiles e leais e proporcionamos aos nosos gobernos un documento”, dixo, confirmando que, neste momento, Galicia e o Norte de Portugal están a traballar nun novo Plan de investimentos conxuntos que responderá ao novo marco europeo 2021-2027.
Un plan, que será presentado no próximo Plenario da Comunidade de Traballo como ferramenta crave para afrontar os novos retos, e que contará con varios eixos: a innovación, a dixitalización e a internacionalización para a creación de emprego; a transición ecolóxica e a descarbonización; o desafío demográfico e as ameazas á saúde pública; e a cohesión social.
Nesta liña, o presidente da Xunta concluíu lembrando que o último Programa Operativo POCTEP permitiu levar a cabo 80 proxectos, cun investimento conxunto que supera os 131 millóns de euros.
