CXT entende que o novo servizo de Renfe que acurta o tempo de viaxe entre Pontevedra e Madrid en case unha hora e media “tiña que comezar en Vigo e non entrar en Compostela”.
Para iso, como xa expuxo, cre que debía utilizarse a variante de Conxo, “que permite ir desde Vilagarcía a Ourense sen paradas, minguando aínda máis o tempo de viaxe ao non facer parada e cambio de cabina en Compostela“.
Segundo concreta, esta proposta xa a incluíu na súa alternativa de ferrocarril para Galicia do ano 2017 e acaba de actualizala a primeiros de ano.
Con todo, apoia este novo servizo e apunta que solicitou ao ministerio que autorice a venda de billetes “permitindo que os cidadáns galegos poidan utilizar este novo tren de longa distancia como media distancia”.
