O tráfico na autoestrada AP-9 estivo condicionado na primeira hora da mañá deste venres por mor dunha colisión entre dous camións, que se saldou sen feridos, á altura do punto quilométrico 156, en Vigo.
Segundo informou o 112 Galicia, tivo constancia do suceso ás 5,30 horas deste venres tras recibir a chamada dunha persoa particular. A testemuña do accidente afirmou que os dous vehículos de transporte chocaran á altura da parroquia de Candeán e que os restos dos vehículos accidentados por culpa do golpe ocupaban parte da vía.
Por iso, o 112 puxo a situación en coñecemento dos axentes da Garda Civil de Tráfico e da Policía Local, ademais dos profesionais do servizo de mantemento da autoestrada. Deste xeito, un dos carrís da AP-9 tivo que ser cortado para facilitar os labores de limpeza na estrada.
