O persoal de Madeiras Igrexas, empresa fabricante de tarima flotante situada no Porriño, sairá á rúa de novo para pedir a implicación do goberno galego na procura dunha solución que impida a desaparición da factoría e a perda de case 150 empregos.
Con esta marcha, que sairá ás 11,00 horas das instalacións da empresa, en dirección ao Concello do Porriño, o persoal quere forzar a implicación da Xunta “dunha vez”, xa que Maderas Iglesias “ten os días contados” se saen a poxa os seus terreos, tal e como decretou o xulgado.
Nas últimas semanas os traballadores intensificaron os contactos a nivel institucional para chegar a unha solución ‘in extremis’ que poña remedio á grave crise da empresa, que chegou a ser un importante provedor no sector da construción e a ter 800 empregados (a maioría mulleres).
Os representantes dos traballadores denunciaron que seguen “esperando” a que o goberno galego contacte con eles, como “se comprometeu”, e instaron á Administración a “dar un paso á fronte” porque “o tempo se esgota”. A ese respecto, lamentaron que tanto a Consellería de Industria como o IGAPE “están a deixar morrer unha compañía galega que foi punteira a nivel mundial no sector da madeira”.
