O Porto de Vigo licitou, por case 7 millóns de euros, as obras para reformar a zona das Avenidas, incluído o tramo de paseo no peirao que se esborrallou durante un concerto no festival O Marisquiño 2018, e a zona de Beiramar, e prevé adxudicar os traballos a finais deste ano.

Segundo informou en rolda de prensa o presidente da Autoridade Portuaria, Enrique López Veiga, este venres informouse ao Consello de Administración da licitación das obras. Ata o momento presentáronse máis de 60 empresas ao proceso, e espérase que as obras se adxudiquen a final de ano e estean rematadas en xullo do ano que vén.

Así, explicou que o investimento previsto para renovar o lousado das Avenidas é de algo máis de 2 millóns de euros; mentres que a reforma do peirao sinistrado custará case 3 millóns; e a mellora da Avenida de Beiramar, onde se fará un carril-bici, custará 1,8 millóns de euros.

Por outra banda, López Veiga trasladou ao Consello o informe de xestión correspondente ao mes de agosto, e constatou que “o Porto está a recuperar a súa actividade”, que sufriu un descenso notable durante o estado de alarma, especialmente polo peche da planta de PSA. No entanto, precisou que o tráfico de cruceiros aínda non dá mostras de recuperación, e posiblemente non o fará ata que se estenda unha vacina contra a COVID.

Con respecto aos tráficos, estes aumentaron un 7,67 por cento con respecto a agosto de 2019, levantados polo bo comportamento do tráfico de mercadorías (que subiu máis dun 10 por cento). Por contra, a pesca fresca experimentou un descenso do 15,68 por cento no volume de movementos e baixou tamén o valor da mercadoría un (12,38 por cento menos).

Finalmente, e a preguntas dos medios sobre a súa continuidade como presidente do Porto, López Veiga eludiu pronunciarse e lembrou que esa decisión depende do presidente da Xunta e da conselleira do Mar, e remitiuse ao que estes digan. En todo caso, ironizou: “Nalgún momento terá que haber unha substitución, en 10 anos eu non estarei aquí”.