A nova Directora Xeral de Saúde Pública de Galicia, Carmen Durán, defendeu que a situación epidemiolóxica en Galicia pola incidencia do coronavirus está “moi lonxe de empeorar de maneira exponencial” e expuxo que a situación atópase “estabilizada”. “Con tendencia á baixa desde agosto, a transmisión do virus está a reducirse”, sinalou a preguntas da deputada do BNG María Montserrat Prado na comisión de Sanidade, Política Social e Emprego.

En concreto, a súa resposta estivo vinculada á pregunta do BNG en relación ás medidas do Goberno galego ante a evolución do COVID en Galicia e con reproches tamén por parte da deputada nacionalista á “falta de transparencia inadmisible” en relación á información que se facilita.

E é que a deputada situou a Galicia “á cabeza na opacidade” en relación cos datos do COVID. Ademais, na súa intervención, lamentou “que a estratexia” para facer fronte á pandemia “non pase por reforzar a Sanidade pública”.

Fronte as súas críticas, a nova directora xeral de Saúde Pública defendeu o traballo feito desde a Xunta, aludindo, entre outras cuestións, ao rastrexo; ás probas para detectar posibles positivos ou as actuacións vinculadas cos brotes.

Incidencia

“A 16 de setembro, no 78,8% dos casos non se sabe a orixe“, dixo a deputada nacionalista en referencia a un informe do Instituto de Saúde Carlos III e incidindo en que se trata dunha porcentaxe por encima da media nacional.

A directora xeral de Saúde Pública replicou que a taxa de incidencia por cada cen mil habitantes en Galicia está “por baixo” da media española, facendo referencia, para iso, ao mesmo estudo. Tamén apelou ao “esforzo no control de brotes”. “Está a dar os seus froitos”, sentenciou despois de que a deputada nacionalista requirise apostar por estudos de monitoraxe das augas residuais para detectar “carga viral” e aplicar medidas en base a eles. “Estamos a actuar en base a probas máis sólidas”, expuxo Carmen Durán.

Rastreadores

Na comisión, tamén se centrou o debate na figura dos ‘ rastreadores’. En particular, a deputada nacionalista requiriu á directora xeral de Saúde Pública que especificase que número de persoas contratadas e como se realizan os rastreos.

Carmen Durán dixo que responde “a un modelo flexible, baseado na xestión por procesos e integrado por equipos multidisciplinares“. “Os profesionais de medicina preventiva e saúde laboral das distintas áreas sanitarias identifican casos e contactos en hospitais e profesionais do Sergas”, citou como parte deles.

A estes, sumou “o servizo de vixilancia epidemiolóxica, nos que se integraron traballadores sociais, fundamentais na educación e residencias”, dixo sobre os posibles casos nestes centros.

Durán engadiu a este colectivo o persoal de Atención Primaria, “que realizan o seguimento dos contaxiados nos seus domicilios” e a “central de seguimento de contactos”, “integrado por profesionais perfectamente formados e que, ademais, dispoñen de protocolos, de procedementos elaborados desde Saude Pública”.

Unha información que contrasta coa situación denunciada polos propios profesionais que falan de falta de coordinación entre este “supostos equipos de rastreo” e os médicos de familia.

Antes, con todo, Montserrat Prado recriminoulle que a única información da que dispoñen “é que se contratou un call center e sabemos que unha persoa que está á fronte desta empresa ten relación directa co presidente da Xunta“.

“É difícil facer un control a este goberno”, dixo recriminado que o conselleiro de Sanidade, Julio García Comesaña, manifestase que non podía responder á pregunta formulada polo PSdeG sobre o número exacto de rastreadores cos que conta Galicia, debido a que para iso tería que saber “o que vostede –en referencia a Julio Torrado– considera” como rastreador, dixo no pleno de onte.

Interlocución nos concellos

Desde as filas do PP, preguntouse tamén pola interlocución cos concellos en relación aos datos do COVID, tras as queixas expostas por algúns municipios. Ddesde esta formación –non así desde a oposición– negouse que faltase comunicación.

“Desde un primeiro momento contouse coa presenza e a voz das entidades locais”, ha replicado Alberto Fuentes, que apelou tamén ás reunións diarias nos concellos con restricións.

A situación na comarca do Salnés foi outra das cuestións debatidas na comisión, despois de que os socialistas denunciasen falta de profesionais sanitarios. O xerente do Sergas, José Flores, defendeu que “a dotación é adecuada” e vinculou o número actual á “redución” de poboación. Mentres, destacou o “esforzo” na adecuación dos centros sanitarios.