Hai grandes cancións con historias descoñecidas detrás. E tamén hai historias que por parecer pequenas moitas veces foron ignoradas. ‘Una historia, una canción’, un novo proxecto orixinal de Movistar+ tenta levar cancións a esas historias e encher de historias esas cancións.
A cantante Zahara ponse á fronte deste novo formato de catro episodios que xa se está gravando en diferentes puntos da xeografía española: Nigrán (Pontevedra), Los Alcázares (Murcia), Cuevas de Cañart (Teruel) e Úbeda (Xaén), a localidade natal de Zahara.
Cada un dos catro episodios tratará temas tan universais como locais: os desastres ecolóxicos e o cambio climático, o amor á terra e as raíces ou a España baleirada.
O primeiro programa gravouse no municipio de Nigrán que en 2017 foi arrasado polos incendios. Zahara puido conversar cos seus veciños sobre as terribles consecuencias do lume, pero tamén sobre a solidariedade ou a heroicidade da xente. A cambio, regaloulles as súas cancións. Ademais, este primeiro programa pecha cun concerto do artista coruñés Xoel López no que tamén participa o ilustre veciño de Vigo Iván Ferreiro e a propia Zahara.
Os seguintes episodios serán gravados durante as próximas semanas en Los Alcázares (Murcia) e Cuevas de Cañart (Teruel), onde Zahara contará coa colaboración do grupo Viva Suecia e do cantautor Guitarricadelafuente respectivamente. Xa en Úbeda (Xaén), a súa localidade natal, atoparase con Martí Perarnau para tocar por primeira vez as cancións de Juno, o seu proxecto conxunto.
