O Xulgado do Mercantil número 3 de Pontevedra, con sede en Vigo, emitiu unha providencia na que deixou sen efecto a citación para que a empresa Marina Meridional, do grupo Argos, formalice a compra do estaleiro vigués Factorías Vulcano, que fora prevista para o vindeiro martes.
A semana pasada, a empresa presentou un recurso de reposición contra a data fixada polo xulgado para facer efectiva a entrega dos 7,8 millóns de euros que ofertara por Vulcano.
Con todo, fontes xudiciais detallaron que, debido aos prazos legais para tramitar o recurso, este non se pode resolver antes do 22 de setembro, o día no que se citou a Marina Meridional nunha notaría para formalizar a adquisición. Así as cousas, o xulgado deixou sen efecto esa convocatoria “co fin de non causar dano irreparable estando en prazo de resolver o recurso”.
Na providencia, o maxistrado explicou que a recepción do traslado do recurso de reposición para alegacións á Tesouraría Xeral da Seguridade Social tivo lugar o pasado 9 de setembro. Mentres, o prazo para as alegacións finalizará o 22 de setembro, data que coincide co día fixado para a citación en notaría.
Pola súa banda, nos últimos días, Marina Meridional comunicou ao xulgado que desiste da súa solicitude de venda individualizada de Vulcano, aínda que mantivo a súa oferta de 7,8 millóns de euros polo estaleiro.
