A Consellería de Medio Ambiente, Territorio e Vivenda adxudicou por 30.000 euros as obras de acondicionamento e mellora da senda botánica e o parque infantil de Circos, no parque natural do Monte Aloia de Tui.
Así o trasladou a conselleira en funcións, Ángeles Vázquez, nunha visita ao parque este mércores, na que detallou que se colocará nova sinalización e carteis informativos sobre as diferentes especies, ampliarase o percorrido do paseo botánico e mellorarase o firme. Na zona infantil crearanse novos espazos e xogos, así como un circuíto biosaludable.
Estas actuacións, cuxo prazo de execución é de tres meses, servirán para complementar outros traballos de conservación que xa se están levando a cabo no parque (o primeiro declarado parque natural en Galicia), para restauración e adecuación doutros espazos.
Ademais desas obras, a Consellería adxudicou un contrato para a realización de campañas de divulgación, promoción do turismo de natureza sustentable e educación ambiental neste parque.
A actuación, confinancida nun 80 por cento a través de fondos europeos, pretende que se poida dispor dun servizo de atención ao público e de sensibilización, na Casa Forestal Enxeñeiro Areses, ademais de facer un labor de divulgación deste espazo.
PARQUE NATURAL DESDE 1978
O Monte Aloia, declarado parque natural en 1978 conta cun Plan Reitor de Usos e Xestión aprobado a principios deste ano, que ten como reto ampliar a protección e convertelo nun exemplo de xestión da auga e dos hábitats asociados.
Ademais deste atractivo, este parque destaca polo seu modelo de explotación silvícola do monte comunal, compatible coa conservación da biodiversidade.
