Un mariñeiro de 50 anos de idade, natural de Cangas, faleceu nas últimas horas por unha afección cardíaca repentina, cando se atopaba a bordo dos pesqueiro ‘Irmáns Touza’, que ten base en Vigo e que estaba a faenar en augas de Malvinas.

Segundo informaron fontes da armadora do buque, o falecemento produciuse de forma súbita, por un problema cardíaco, e a empresa está xestionando os trámites para repatriar o corpo do mariñeiro.

As mesmas fontes confirmaron que o barco, que se atopaba capturando lura, dispón de equipos desfibriladores a bordo e a tripulación ten formación para usalos, con todo, neste caso o episodio foi tan repentino que non foi posible facer nada polo mariñeiro, que acabou falecendo.