O Concello de Vigo reforzará a vixilancia sobre o uso de máscaras en espazos públicos e sobre o cumprimento de todas as restricións para controlar a pandemia de coronavirus, e reducirá aínda máis os aforamentos en espazos municipais.

Así o trasladou o alcalde, Abel Caballero, despois da reunión do comité municipal de seguimento da pandemia.

Á vista dos rebrotes e o incremento de casos activos de COVID-19, o rexedor anunciou que se reducirán aínda máis os aforamentos en espazos municipais, como salas de exposicións e museos, e en eventos como as vodas que se celebran no Pazo de Castrelos (fixarase un máximo de 25 asistentes no interior do edificio).

Así mesmo, e xa a partir desta fin de semana, reforzarase a vixilancia sobre o cumprimento de medidas como o uso das máscaras na vía pública, a prohibición de fumar se non hai distancia interpersoal, ou a prohibición de aglomeración de persoas na rúa ou locais.

A ese respecto, Abel Caballero insistiu en que “está terminantemente prohibido” beber na rúa se non é unha terraza ou mesa habilitada, en alusión á habitual concentración de clientes de locais situados en zonas como a contorna da Concatedral. “Non se poden vender bebidas para ser consumidas nunha praza”, advertiu.

Nesa liña, asegurou que o Concello e a Policía Local permanecerá “moi vixiantes”, especialmente cos “recalcitrantes” que perseveran nos incumprimentos, e proclamou que “se hai que multar, multarase”. “Tomémonolo en serio, isto non é unha broma”, resolveu.