Especialistas do Servizo de Desactivación de Artefactos Explosivos da Garda Civil da Comandancia de Pontevedra recolleron en Moaña “unha importante cantidade” de mecha lenta e restos de varios cartuchos de dinamita que se atopaban dentro dunha propiedade privada dun poceiro falecido hai varios anos.
Así o informou o Instituto Armado, que indicou que tanto a mecha lenta, cos restos dos cartuchos de dinamita, foron localizados o pasado martes no baixo cuberta da vivenda dunha persoa falecida hai 16 anos que se dedicaba á construción de pozos de auga artesáns.
Cando o dono da leira puxo o feito en coñecemento do Posto da Garda Civil de Moaña, “adoptáronse inmediatamente as primeiras medidas de prevención“, destacaron as mesmas fontes, e activouse de forma inmediata o protocolo de actuación por parte dos Tedax da Garda Civil para a neutralización e recollida do material para a súa total destrución.
O equipo Tedax, sinalou a Benemérita, que acudiu ao lugar da incidencia confirmou que eran 300 metros de mecha lenta e restos de varios cartuchos de explosivos tipo dinamita, “comunmente utilizado na época para a realización de voaduras en construción de pozos e outros usos similares”, puntualizaron as mesmas fontes.
Os restos atopados, “debido á súa antigüidade e mal estado de conservación, tiñan cristalizada a nitroglicerina que contiña polo que facía a súa manipulación extremadamente perigosa”, subliñou a Benemérita.
Ante este tipo de achados os Técnicos Especialistas en Desactivación de Explosivos da Garda Civil aconsellan “non abandonar este material como lixo” e lembran que a forma de actuar cando se localice algún artefacto ou material explosivo consiste en “non tocar nin manipular o obxecto, sinalizar e acordoar a zona e avisar de inmediato á Garda Civil a través do teléfono 062”.
